Cynllun yn y Bala yn ennill gwobr peirianneg sifil
![](https://cdn.cyfoethnaturiol.cymru/media/lcinbweu/ice-2.png?anchor=center&mode=crop&quality=80&width=770&height=450&rnd=133610217129630000)
Mae prosiect diogelwch cronfa ddŵr yng Ngogledd Cymru wedi cael ei gydnabod mewn seremoni wobrwyo.
Profodd Prosiect Gwella Diogelwch Cronfa Ddŵr Llyn Tegid Cyfoeth Naturiol Cymru yn y Bala lwyddiant yng Ngwobrau Peirianneg Sifil ICE Wales Cymru 2023, gan ennill Gwobr Alun Griffiths am Ymgysylltiad Cymunedol.
Dangosodd y prosiect safonau rhagoriaeth wrth ymgysylltu â’r gymuned leol gyda phwyslais ar faterion cymdeithasol, economaidd ac ecolegol i sicrhau cynaliadwyedd a lles yn y dyfodol.
Cynhaliwyd gwaith yn Llyn Tegid i'w alluogi i wrthsefyll tywydd eithafol a darparu amddiffyniad i fwy nag 800 eiddo ac fe'i hariannwyd gan Lywodraeth Cymru.
Fe'i cyflawnwyd gan William Hughes Peirianneg Sifil, Binnies, Arcadis, Ground Control a Dams and Reservoirs Ltd ac roedd yn cynnwys cryfhau argloddiau'r llyn gyda mwy na 13,000 tunnell o greigiau.
Roedd y gwaith, a gwblhawyd ym mis Mawrth eleni, yn cynnwys gwelliannau amgylcheddol a hamdden fel llwybrau troed gwell ac ardaloedd eistedd newydd yn ogystal â phum hectar o gynefinoedd naturiol wedi'u hadfer ac ardaloedd newydd o ddolydd blodau gwyllt.
Dywedodd Keith Jones, Cyfarwyddwr, ICE Wales Cymru:
“Rydym yn llongyfarch Cyfoeth Naturiol Cymru a phawb a fu’n rhan o’r prosiect buddugol hwn. Nid yn unig y mae’r cynllun hwn wedi diogelu a gwella’r amgylchedd ond mae hefyd wedi cynnwys y gymuned, gan sicrhau dyfodol disglair i drigolion a’r economi. Mae’n enghraifft wych o’r rôl y mae peirianneg sifil yn ei chwarae yn ein bywydau.”
Dywedodd Clare Pillman, Prif Weithredwr CNC:
“Rydym yn falch iawn o fod wedi bod yn llwyddiannus yng Ngwobrau Peirianneg Sifil ICE Wales Cymru gyda phrosiect Llyn Tegid.
“Gall effeithiau llifogydd fod yn ddinistriol a pharhaol. Wrth i’r newid yn yr hinsawdd ddod â thywydd eithafol yn amlach yn ei sgil, bydd y gwaith i gryfhau argloddiau’r llyn yn helpu i leihau’r perygl o lifogydd i dref y Bala.
“Dyma enghraifft o safon y gwaith sy’n digwydd i helpu i ddarparu llu o fanteision i gymunedau ledled Cymru.
“Fe wnaeth pobl leol chwarae rhan allweddol wrth lunio’r prosiect a chafodd eu mewnbwn, yn enwedig o ran y cyfleoedd amgylcheddol a hamdden, ei weithredu ochr yn ochr â’r gwaith.
"Hoffwn ddiolch i'n staff, ein partneriaid a'n cymunedau lleol am ein helpu i gyflawni'r prosiect hwn sy'n rhan o'n gwaith ehangach i sicrhau bod Cymru'n gallu gwrthsefyll effeithiau newid yn yr hinsawdd."
Mae Gwobrau Peirianneg Sifil ICE Wales Cymru yn dathlu prosiectau o bob maint a chwmpas o bob cwr o Gymru ac fe’u cynhaliwyd ar 22 Medi yng Nghaerdydd.