Arbenigwyr CNC ar lwyfan Cynhadledd Tystiolaeth Forol Cymru
![](https://cdn.cyfoethnaturiol.cymru/media/3ucayykv/new-marine-evidence-conf-770x450-2.png?anchor=center&mode=crop&quality=80&width=770&height=450&rnd=133610371968630000)
Kirsten Ramsay, Arweinydd Tîm Cyngor Ecosystemau Morol ac Arfordirol CNC, yw un o’r siaradwyr agoriadol yng Nghynhadledd Tystiolaeth Forol Cymru eleni. Yma, mae’n esbonio pwrpas y gwaith a sut mae ymchwil yn gallu llywio penderfyniadau polisi a rheoli sy’n cael eu gwneud yn amgylchedd morol Cymru.
Mae arbenigwyr o dîm morol Cyfoeth Naturiol Cymru yn edrych ymlaen at drafod amrywiaeth o bynciau yng Nghynhadledd Tystiolaeth Forol Cymru gan sôn sut rydyn ni wedi gweithio gyda phartneriaid ymchwil i feithrin ein gwybodaeth am yr amgylchedd morol.
Mae dod â phobl ynghyd mewn cynhadledd fel hon yn bwysig iawn gan ei fod yn darparu fforwm lle gallwn drafod ffyrdd o gynnal ymchwil a fydd yn bwydo i benderfyniadau polisi a rheoli a fydd yn gwarchod ein hamgylchedd morol.
Ymhlith y siaradwyr o CNC mae Kate Lock, Uwch Arbenigwr Asesu Morol CNC a Natasha Lough, Ymgynghorydd Arbenigol Ecoleg Môr CNC, a fydd yn siarad am dystiolaeth o effeithiau ar fôr-wyntyllau pinc o amgylch Ynys Sgomer a sut bydd hyn yn darparu gwybodaeth i’n helpu i reoli’r rhywogaeth.
Bydd Matt Green, sy’n Uwch Swyddog Asesu Amgylcheddol Morol i CNC, yn siarad am sut mae rhaglenni hirdymor i fonitro gwaddodion gwely’r môr hirdymor unigryw yn cynnig dealltwriaeth o iechyd ein bywyd morol gwych yng Nghymru. Mae creaduriaid gwaddodion gwely’r môr yn ddangosyddion gwych o ystod o lygryddion a mathau eraill o darfu amgylcheddol.
Bydd Tom Stringell, Prif Ymgynghorydd Arbenigol ar Rywogaethau Morol CNC, yn cyflwyno’r astudiaeth a gyhoeddwyd yn ddiweddar gan y Sea Watch Foundation a Phrifysgol Bangor yn archwilio presenoldeb morfilod, dolffiniaid, llamidyddion (teulu’r morfil) a rhywogaethau adar môr yn y moroedd o amgylch Cymru.
Mae Jake Davies yn gweithio ar Brosiect SIARC (Siarcod yn Ysbrydoli Gweithredu ac Ymchwil gyda Chymunedau), prosiect amlddisgyblaethol dan arweiniad CNC a Chymdeithas Sŵolegol Llundain (ZSL) mewn partneriaeth â 19 o sefydliadau, sy’n cydweithio â chymunedau, pysgotwyr, ymchwilwyr a’r llywodraeth. Yn ei sesiwn, bydd Jake yn trafod dulliau’r prosiect i wella’r ddealltwriaeth o siarcod a chathod môr ym moroedd Cymru.
Yn y cyfamser, bydd Hannah Lee, swyddog cymunedol gyda Phrosiect SIARC, yn siarad am y prosiectau sydd ar waith i gynyddu natur gynhwysol y prosiect i gefnogi amrywiaeth ehangach o bobl i ymddiddori mewn cadwraeth forol.
A bydd Kathryn Hughes, uwch ymgynghorydd CNC ar gyfer y datganiad ardal forol, yn trafod llythrennedd morol, gan gyflwyno tystiolaeth o arolwg llythrennedd morol a gomisiynwyd gan Defra mewn cydweithrediad â Cyfoeth Naturiol Cymru, Llywodraeth yr Alban a’r Ocean Conservation Trust.
Mae’r Gynhadledd Tystiolaeth Forol ar 27, 28 a 29 Chwefror 2024 yn cael ei chynnal gan Platfform yr Amgylchedd Cymru, gyda Llywodraeth Cymru a CNC, yng Nghanolfan Rheolaeth Bangor, ac mae modd ei chyrchu ar-lein yn ogystal.